早上我同CC到達台中高鐵站搭高鐵去左營. 自由席車票要百幾蚊港幣, 好彩唔多人搭有位坐!

到達左營我地聯絡預約好接我地嘅潘先生. 佢似乎仲要D時間先到車站, 好彩車站有間Mos burger可以坐底食吓早餐. 潘先生終於出現, 佢部車係一部黑色嘅van, 我同CC上車後潘先生話仲有幾位客人未到, 佢笑住咁叫我地等等. (當潘先生笑嘅時候佢露出佢一口黑色嘅牙齒......明顯地係食檳榔蝕到D牙黑晒, 仲要蝕到每顆牙都變成細細粒...好得人驚!!!) 終於有一家人到左, 佢地上車後潘先生話再開車去機場接另外兩個客人.....吓???又去接人?部車已經好迫啦, 仲有人要接??? 原來機場有兩個香港女仔都係去墾丁, 不過佢地一上車就好cool, 反之台灣o個個家庭嘅一位呀姨非常健談, 所以兩個幾鐘嘅車程都非常好玩.

終於到達墾丁, 潘先生當然直接送我地到民宿門口啦~

一到門口就覺得無選錯地方, 真係好特色呀!!!墾丁愛情海民宿~

入到民宿大廳見到民宿主人鄔先生嘅卡通全家幅, 好warm呢~

由於房間未ready, 鄔先生俾左杯welcome drink冬瓜茶我地休息吓~

房間終於ready, 我地小休片刻之後就正式開始墾丁小綿羊冒險之旅啦~

好彩一早o係香港申請左國際牌, 因為民宿有機車出租, 而且價錢非常相宜, 所以我同CC就租一部小綿羊周圍玩啦! 因為太耐無揸車, 而且唔識路, 開頭都有D驚. 好彩鄔先生俾左張地圖我, 仲用營光筆highlight埋我地可以去邊度玩. 

在民宿外稍作練習之後就叫CC上車, (其實CC夠膽坐我車尾真係大膽!因為我對自己都無咩信心!) 由小路一出去就係墾丁大街, 兩旁都係商店, 不過就唔多人, 而且路上都唔多車, 又只有一條大直路, 所以除左成日要remind自己要行右邊之外, 都無太大問題.

我地第一個目的地當然係去醫肚先啦! 飯後再開車去第一個景點: 海灘~

去到海灘, 當然要換返對沙灘拖襯返個環境啦!

哈哈, 其實得個樣, 我地只係o係沙灘行吓, 游水? no way!

海灘旁邊一大塊嘅石頭叫帆船石, 都幾似ar!

散完步就繼續沿住海邊馬路一直行, 見到邊度靚就停車行吓, 風景真係一流呀~

不過當日天氣唔多好, 個天好快就黑啦, 我地經小路返民宿, 途中有一間好特別嘅民宿:

其實我地係行錯路先見到呢間民宿, 真係錯有錯著呢!

晚上我地嘅節目就係行墾丁大街, 夜晚真係熱鬧好多, 不過當然又係唔可以同台北夜市比較啦!

鄔先生叫我地必定要試一試燒魷魚, 佢話好大隻好好食ka!

除左魷魚仲有蝦tim ar, 不過我識左CC咁耐都係今次旅行先知原來佢對蝦有嚴重敏感, 真係奇怪....原來我地識左咁耐都無一齊食過蝦???

小販檔旁邊嘅小型遊戲機, 好懷舊呀!

係時候要介紹一吓帶我地周圍玩左一日嘅機車啦, 係咪好新淨好有型呢! 見到佢時都好開心部車係咁新淨, 而且價錢真係一d都唔貴, 只要百幾蚊港幣就可以租到24小時 (雖然要自己去入油, 不過台灣油價真係好平囉!) 以前好羡慕同事們都o係日本租車自遊行, 今次終於可以一嘗自駕遊嘅樂趣, 真係好爽呀!!!

民宿夜景, 一樣咁特色!

我地嘅房間, 我相信係全民宿最普通嘅房間, 不過我都好鍾意啦! 但係美中不足係廁所唔係乾濕分離浴室, 要扣小小分啦!